En il studio da RTR
Foto: RTR
Medias
Entant ch'il rumantsch vegn duvrà en il Grischun gia davent dal cumenzament dal 19avel tschientaner en la pressa, han ils Ladins da las Dolomitas stuì spetgar pli ditg fin ch'els han pudì leger l'emprima gasetta en lur lingua materna. Il Grischun posseda oz ina gasetta dal di rumantscha, La Quotidiana, la Ladinia posseda ina gasetta emnila, La Usc di Ladins. Ch'igl è pussaivel d'edir en il Grischun ina gasetta dal di e segiramain in merit da l'agentura da pressa Agentura da Novitads Rumantscha.
I vegnan edids regularmain chalenders annuals, cronicas ed autras publicaziuns tant per rumantsch sco er per ladin da las Dolomitas. La purschida d'emissiuns per la lingua materna rumantscha da radio e televisiun (Radio e Televisiun Rumantscha) è pli vasta che quella dals Ladins da las Dolomitas. En la mesadad dals onns 1950 ha cumenzà l'emettur "Bulsaun" da la RAI ad emetter emissiuns da radio en lingua ladina da las Dolomitas, pir pli tard èn vegnidas tiers er emissiuns da televisiun. Il rumantsch ed il ladin da las Dolomitas vegnan duvrads dapi intgins onns er en l'internet (vesair per quai la glista dals links correspundents).