Fil Cultural
Malgrà ils impediments topografics ed ils cunfins politics demussan las duas cuminanzas linguisticas numerusas sumeglientschas: las ragischs linguisticas cuminaivlas, la situaziun geografica en il territori alpin, la cultura alpina tradiziunala, las sfidas actualas sco minoritads linguisticas e culturalas, la dumonda da las mesiras adequatas per il mantegniment e per la promoziun da linguas minoritaras periclitadas.
Sin basa da quai ha il Portal Fil Cultural la finamira d'infurmar vicendaivlamain davart l'istorgia, davart la situaziun actuala e davart projects currents. Ultra da quai sa drizza il portal a persunas d'ordaifer ch'è s'interessan per omaduas linguas minoritaras.
Il portal vegn purtà dals dus uffizis da cultura dal Tirol dal sid e dal chantun Grischun sco er da l'instituziun linguistica Lia Rumantscha. Las instituziuns purtadras engrazian ad Interreg per il sustegn finanzial.
La plattafurma d’internet furnescha infurmaziuns cumplessivas davart l'istorgia e davart la situaziun actuala da las duas cuminanzas linguisticas. Igl n'è dentant betg adina simpel da survegnir la resposta ad ina dumonda concreta davart la situaziun linguistica en il Grischun u en las Dolomitas causa la gronda quantitad da datas. Qua serva il Portal Fil Cultural per uschè dir sco register dal cuntegn. El ordinescha ils cuntegns ch'èn avant maun en l'internet tenor aspects tematics ed als fa accessibels davent dad in portal central. La responsabladad per ils cuntegns resta tar las administraturas e tar ils administraturs da las paginas externas. Cumplementarmain porscha il portal texts d'access infurmativs ed infurmaziuns supplementaras multimedialas tar ils singuls temas. Ina fanestra da novitads (news) fa attent a projects linguistics currents ed a svilups da la politica da linguas da la Rumantschia e da la Ladinia. Il portal duai dar in impuls per purtar sur ils cunfins la ritgezza culturala da las duas linguas parentadas sco er da schliar problems e dumondas pli e pli da cuminanza.