Palais Widmann, Balsam
Sorvisc publics
I sorvisc publics pîta n contribut important por le mantignimënt de trami i lingac manacià. Tla Svizera é le rumanc reconesciü sciöche lingaz ofizial de pert.
A livel cantonal vel le todësch, le rumanc y le talian aladô dla costituziun cantonala nöia sciöche lingac aministratifs y statai reconesciüs al medem livel. Sides a livel cantonal co a livel federal éson al momënt tl laûr da arjigné ca leges por le lingaz.
Tla Talia à i ladins che vir te Südtirol y tl Trentin, zacotan de provedimënć de sconanza a despet di ladins che vir tla Provinzia de Belun. Ilò é la sconanza dla mendranza y la promoziun dl lingaz gonot liades a porsones singoles, che laôra debann. Tla regiun Trentin-Südtirol vëgnel sostignì les istituziuns culturales, che se dà jö cun le lingaz y la cultura ladina, sciöche por ejëmpl l’istitut cultural ladin “Micurà de Rü” te Südtirol o “Majon di Fascegn” tl Trentin. Le lingaz ladin vëgn chilò adorè inće tl’aministraziun publica. N contribut important tl ćiamp di sorvisc publics vëgn pité a pora nia inće dala scora, che à tles valades ladines de Südtirol n model paritetich sciöche fondamënta.