La Quotidiana
Foto: RTR
Media »
Media Rumantschia
La stampa retoromana va derevers ai pröms agn dl 19. secul, canche les trëi confederaziuns é gnüdes trasformades tl Ćiantun di Grijuns, organisé te na manira unitara. Dl 19. y dl 20. secul él gnü fora por grijun n gröm de folieć, de chisc nen él ma rové püć inćina nos. Ćina dl 1996 êl ćiamò cater folieć edemai rumanc, vignun scrit te n ater idiom. Dal 1997 incà él gnü retlamisé le foliet da vigni dé retoroman: La Quotidiana , te chël che al é gnü integrè en pert i folieć edemai. La Quotidiana (LQ) à na storia lungia. Scebëgn che le bojëgn por n foliet da vigni dé retoroman foss bele gnü reconesciü dezegn denant y che an foss sigüsc de chësc, él gnü baratè fora na comisciun de stampa indolatra, do da l’öt (1988) nen él gnü na secunda (1992). Impormò l’agenzia de stampa Agentura da Novitads Rumantscha (ANR), metüda sö dl 1996 dala Pro Svizra Rumantscha y finanziada dala Federaziun y dal Ćiantun à cherié na fondamënta importanta por la realisaziun de n foliet da vigni dé. Dlungia le renovamënt dl lingaz promöi le foliet da vigni dé por düć i rumanc l’arvijinamënt di cin idioms, al cheriëia punć danter les valades rumances y privilegëia la formaziun de na identité unitara. Le radio rumanc (Radio e Televisiun Rumantscha, RTR) é na unité aziendara dla SRG idée suisse. La lege federala se tëgn al fat che la SRG mëss mëte en ona almanco n program radio por la Svizera rumancia. Laprò stabilësc le consëi federal i prinzips aladô de chi che al mëss implü ćiamò gnì tignì cunt di bojëgns por le radio y la televijiun de chësc raiun linguistich (contignü dl sorvisc publich, chël ô dì de na oferta de program che tëgnes cunt di bojëgns desvalis y di interesc dla popolaziun de düć cater i raiuns linguistics dla Svizera). La pröma trasmisciun radiofonica rumancia é gnüda metüda en ona dl 1925, la pröma trasmisciun televisiva bëgn 40 agn plü tert, l’ann 1963. Radio Rumantsch (RR) mët en ona al dedaincö n program de 24 ores. Le program radiofonich pîta n’aurela cörta desvalia, informaziuns regionales, nazionales y internazionales y sport, ponü ite te tröpa musiga. Sciöche spezialité porta RR musiga autentica che vëgn dala Rumancia. La televijiun rumancia (TvR) é da odëi sön le canal dla televijiun svizera todëscia SF1 (cun la repetiziun sön SFinfo y RSI LA 2). Tla niscia de tëmp da vigni dé de 15 menüć mët en ona TvR dal lönesc ala sabeda la trasmisciun informativa d’atualité sön i Grijuns y la Rumancia “Telesguard”. Vigni domënia val en ona la trasmisciun “Cuntrasts”, che mostra films de mesora y documentaziuns sön de vigni sort d’argomënć. Por i agn che vëgn vëgnel programè de laurè fora i programs radiofonics y televisifs, dantadöt ponsan a n canal aposta por TvR. Sön http://www.rtr.ch/ pon ascutè y odëi da indlunch y te vigni momënt le radio y la televijiun rumancia.