Fil Cultural
Scebëgn che al sides ostacui topografics y i confins politics, presënta les döes comunitês linguistiches n gröm d’analogies: les medemes raîsc linguistiches; la posiziun geografica tl raiun alpin; la cultura alpina tradizionala; les provocaziuns atuales sciöche mendranzes linguistiches y culturales; la domanda do les dërtes mosöres por le mantignimënt y la promoziun de lingac de mendranza en prigo.Dan da chësta culissa se tol dant le Portal Fil Cultural sciöche travert d’informè sön la storia, la situaziun atuala y i proieć che an é tl laûr da realisé te trami i raiuns. Laprò é le portal inće ponsè por jënt da foradecà che s’interessëia de trami i lingac de mendranza.Le portal vëgn sponsorisé dales istituziuns culturales de Südtirol y di Grijuns sciöche inće dala istituziun linguistica Lia Rumantscha. Les istituziuns portëntes rengrazia Interreg por le sostëgn finanziar. Internet dà informaziuns generales en cunt dla storia y dla situaziun atuala de trames les comunitês linguistiches. Porvia dla cuantité d’informaziuns él datrai ri da ciafè la resposta a na domanda concreta sön la situaziun linguistica di Grijuns o dles Dolomites. Le Portal Fil Cultural se presënta chilò a val’ manira sciöche indesc. Al ordinëia i contignüs dan man te internet aladô argomënć y dà la poscibilité de ti podëi pormez da n portal zentral. La responsabilité por i contignüs resta pro i aministradus dles plates esternes. Sciöche injunta laprò pîta le portal ćiamò tesć d’azès informatifs y informaziuns multimediales ajuntades liades ai argomënć spezifics. Na finestra de novitês fej referimënt ai proieć linguistics dl momënt y ai svilups politich-linguistics tla Rumancia y tles Dolomites. Al dess stimolé da portè la richëza culturala de trami i lingac parentà sura i confins fora sciöche inće da ti jì pormez a problems y a chestiuns atuales tres plü te na manira unitara.